“Warqadda cad” waa dukumeenti muhiim ah oo lagu sharaxo fikradaha iyo qorshaha mashruuc, gaar ahaan gudaha suuqa crypto. Waxay noqotay qayb aan laga maarmi karin bilowga mashruucyo badan, waxaana loo arkaa aaladda ugu muhiimsan ee lagu qanciyo maalgashadayaasha iyo bulshada. Maalgashadayaasha khibradda leh iyo kuwa cusub labaduba waxay u arkaan akhrinta warqadda cad inay tahay tallaabo lagama maarmaan ah ka hor inta aysan maalgelin qorshe cayiman.
Waa Maxay Warqadda Cad (White Paper)?
Asalka warqadaha cad wuxuu ka soo jeedaa dowladda Ingiriiska qiyaastii 100 sano ka hor.
Waxaa markii hore loogu talagalay in lagu wargeliyo shacabka go’aammada iyo siyaasadaha muhiimka ah. Erayga “cad” wuxuu tilmaamayaa in dukumeentiga si buuxda ay u heli karaan bulshadu.
Markii ay ganacsiyadu qaateen, warqadda cad waxay isu bedeshay qalab suuq-geyn oo rasmi ah, oo aan lahayn muuqaal xayaysiis ah, balse si qoto dheer u faahfaahiya dhibaatada jirta, xalalka la soo jeediyay, iyo sida kooxda mashruucu u fulin doonto ballanqaadkeeda.
Waxaa sidoo kale loo adeegsadaa dhisidda sumcadda shirkadda iyo in lagu kasbado kalsoonida dadka ay beegsanayaan.
Kahor Qorista Warqadda Cad (White Paper) .
Ma aha in qoraagu raaco qaab gaar ah, balse waa muhiim in uu fahmo qaabka guud ee loo diyaariyo.
Warqadda cad waxay leedahay yoolal cadcad sida in lagu kobciyo fahamka akhristayaasha ama lagu wacyigeliyo go’aamo dhaqaale.
Tallaabada ugu horreysa waa in si cad loo aqoonsado cidda la beegsanayo. Tani waxay saameyneysaa eray-bixinta, qaabka qoraalka, iyo heerka faahfaahinta farsamo ee la bixinayo. Tusaale ahaan, haddii akhristuhu yahay qof cusub oo crypto ku cusub, waa in laga fogaadaa isticmaalka erayo adag oo aan la sharxin.
Cilmi-baadhista wanaagsani waa laf-dhabarta warqadda cad. Waxaa lagu daraa xog ku saabsan kooxda mashruuca, farsamooyinka lagu dhisayo, iyo sababta xalka la soo bandhigay uu uga fiican yahay xalalkii hore.
Mashruucyada crypto, xogta farsamada waa mid aad muhiim u ah, maadaama khaladaadku dhaawici karaan kalsoonida maalgashadayaasha.
Maxaa Ku Jira Warqadda Cad?
Sida uu tilmaamay Michael Stelzner, qoraalku waa inuu ku bilaawdaa sharaxaadda dhibaatada uu xallinayo. Marka dhibaatadu si cad loo soo bandhigo, waxaa laguu raacinayaa xog tiro-koob ah, jaantusyo iyo tixraacyo cad oo taageeraya qodobada la soo bandhigay.
Kadib waxaa la soo bandhigaa xalka mashruuca, oo ay tahay inuu si toos ah ula xidhiidho dhibaatada la sheegay. Warqad cad ee wanaagsan loo qoray waxay si dabiici ah isku xidhaa dhibaatada iyo xalka.
Qaybaha muhiimka ah ee lagu dari karo waxaa ka mid ah:-
Kooxda mashruuca:- Sawirradooda, taariikh nololeedkooda, iyo lingaxyo (links) ku geynaya LinkedIn/Twitter.
Tokenomics:- Qiimaha token-ka, tirada wareegaysa iyo blockchain-ka lagu soo saari doono.
Shuruudaha maalgelinta:- Habka lagu gadanayo token-ka iyo nidaamka soo celinta haddii lacag ururintu fashilanto.
Khariidadda mustaqbalka (roadmap) ee mashruuca:- Qorshayaasha muddada-gaaban iyo muddada dheer, badanaa waxaa loo kala qaybiyaa saddex biloodle, si maalgashadayaasha iyo bulshada ay u cabbiraan horumarka mashruuca.
Qaabaynta iyo Naqshadeynta
Warqadda cad waa in loo qaabeeyaa si fudud oo la akhrin karo. Meel bannaan (white space) ayaa muhiim ah, si akhristuhu u nasto inta uu akhrinayo. Qaybaha kala duwan waa in si muuqata loo kala saaraa, jaantusyada iyo sawirrada waa in si xirfad leh loo dhisaa.
Naqshadeynta wanaagsan waxay hubisaa in muuqaalka iyo qoraalku ay is waafaqaan. Naqshadeeye xirfadle ayaa ka shaqeyn kara sidii loogu samayn lahaa akhris isku xidhan oo si xirfad leh loo diyaariyay, taasoo kordhisa xusuusta akhristaha ee mashruuca.
Tusaalayaal Caan ah
Bitcoin White Paper:- Waxaa qoray Satoshi Nakamoto, wuxuuna sharxayaa sida lacag dhijitaal ah oo la isku halayn karo ay u shaqeyso.
Ethereum White Paper:- Dukumeenti joogto loo cusbooneysiiyo, oo sharaxaysa qaabka iyo mustaqbalka Ethereum, loona adeegsado sida buug tixraac farsamo ah.
Helitaanka warqadda cad adiga oo aan qorin
Haddii shirkad ama koox aysan haysan waqtiga ama xirfad ay ku qoraan warqadda cad, waxay shaqaaleysiin karaan qoraa ku takhasusay diyaarinteeda. In kasta oo ay qaali yihiin marka loo eego qoraayaasha jaban, qoraa xirfadle ah ayaa kordhin kara fursadda mashruucu ku kasbado maalgelin iyo sumcad.
Warqadda cad ee crypto waa isku-darka cilmi-baadhis qoto dheer, sharaxaad cad, iyo naqshad xirfadaysan.
Dukumeenti si fiican loo diyaariyey ayaa noqon karta aalad lagu helo kalsooni, lagu soo jiito maalgelin, laguna xaqiijiyo guusha mashruuca. Haddii si fiican loo diyaariyo, waxay ka saameyn kartaa farqiga u dhexeeya mashruuc guuleysta iyo mid fashilma.
Ku baro halkan crypto bilaw ilaa dhammaad luqaddaada hooyo
