Bitcoin iyo suuqyada lacagaha dhijitaalka ah ayaa hoos u dhacay kadib markii Madaxweyne Trump uu sheegay inuu ogyahay halka uu ku dhuumanayo hogaamiyaha Iran, isla markaana uu yahay “bartilmaameed sahlan.”
Bitcoin iyo guud ahaan suuqyada lacagaha dhijitaalka ah ayaa si weyn u hoos u dhacay kadib markii Madaxweyne Donald Trump uu sababay jahawareer dhaqaale oo weyn isaga oo hanjabaad u diray Hogaamiyaha Sare ee Iran, Ayatollah Ali Khumeyni.
Trump ayaa Talaadadii baraha bulshada ee Truth Social ku yiri: “Waxaan si dhab ah u ognahay halka uu ku dhuumanayo ninka la yiraahdo ‘Hogaamiyaha Sare.’ Waa bartilmaameed sahlan, balse nabadgelyo ayuu ku sugan yahay halkaas uma dhaqaaqi doono (inaan dilno!), ugu yaraan hadda maaha.”
Bitcoin, Ether, XRP ayaa hoos u dhacay
Trump wuxuu intaas ku daray: “Ma rabno gantaallo lagu rido dadka rayidka ah ama askarta Mareykanka. Dulqaadkeennu wuu sii yaraanayaa. Mahadsanidiin inaad arrintan fiiro gaar ah u leedihiin!” Waxa uu sidoo kale ugu baaqay Iran inay si shuruud la’aan ah isu dhiibto.
Dhacdadani waxay ku soo beegantay xiisadda siyaasadeed ee u dhaxaysa Iran iyo gumaystaha Israa’iil, taasoo dib u qaraxday kadib markii Israa’iil ay habeenkii Khamiista qaaday duqeymo cirka ah oo badan oo ka dhan ah Iran. Iran ayaa iyaduna ka jawaabtay iyadoo qaaday weerarro isugu jira drones iyo gantaallo.
Kadib daabacaadda qoraalka Trump, Bitcoin (BTC) oo markii hore joogtay $104,310 ayaa hoos ugu dhacday $103,553 saacad gudaheed, ka hor inta uusan dib ugu soo laaban $104,770 xilligan aan soo dhignay warbixinta, sida ay sheegayso CoinMarketCap.
Ether (ETH) ayaa hoos u dhacay 1.3%, isagoo gaaray $2,462, halka XRP uu dhacay 1.3% isagoo maraya $2.14 isla xilligan.
Falanqeeyayaal badan oo la socda suuqyada lacagaha dhijitaalka ah ayaa si dhow ula socday Bitcoin oo ka korraysa heerka qiimeed ee $100,000. Xigasho:- CoinMarketCap.
Saadaalaha suuqyada cryptaha ayaa sidoo kale hoos u dhacay. Tusmada Crypto Fear & Greed Index, oo cabbirta dareenka guud ee suuqyada crypto, ayaa hoos u dhacday 16 dhibcood, iyadoo ka timid “Damac badan oo jiray” una dhacday “heer cabsi jirto” markii ugu horreysay 11 maalmood gudahood, iyadoo noqotay dhibco dhan 48/100.
Trump iyo saameynta uu ku leeyahay suuqyada crypto
Tani ma ahan markii ugu horreysay ee Bitcoin iyo suuqyada crypto guud ahaan ay ka falceliyaan hadallada Trump.
Tani waxay soo bilaabatay markii uu Trump ku soo laabtay Aqalka Cad horraantii sanadkan.
February 2-deedii, dhowr maalmood kadib markii la caleemosaaray, Bitcoin ayaa hoos uga dhacay $100,000 markii ugu horreysay lix maalmood gudahood kadib markii uu saxiixay amar fulineed oo cunoqabateyn kusoo rogay waxyaabaha laga keeno Shiinaha, Kanada, iyo Mexico.
Si kastaba ha ahaatee, guushiisa doorashada bishii November 2024-kii ayaa lagu tilmaamay midda keentay kor u kac weyn, taasoo keentay in Bitcoin gaadho $100,000 markii ugu horreysay abid, bishii December 5-teedii.
Falanqeeyayaal ayaa shaki ka qaba in Bitcoin sii joogi karto $100,000
Falanqeeyayaasha qaarkood waxay aaminsan yihiin in xiisadda siyaasadeed ee taagan ay sababi doonto in Bitcoin dib ugu laabto qiimaha ah $100,000.
Falanqeeye Doctor Profit ayaa yiri, “Bitcoin waxay hoos uga dhici doontaa $100,000 maalmaha soo socda.”
Wuxuu sheegay inuu filayo inay gaadho ugu yaraan $93,000, isla markaana suuqa saamiyadu uu raaci doono.
“SP500 wuxuu hoos ugu dhici doonaa 7-10% sidoo kale. Candles cas ayaa naga horreeya,” ayuu raaciyay.
Ganacsatada kale qaarkood waxay arkaan joogitaanka Bitcoin qiimo ka sarreeya $100,000 maalmahan isaga oo saldhig u noqon kara korodh waara oo xooggan.
Ganacsadaha crypto ee Jelle ayaa yiri, “Mar kale, tani waa mid aad uga waaritaan badan, kor u kac degdeg ah oo aan lahayn wax sees ah oo sugan.”
Talaadadii, falanqeeyayaasha Bitfinex waxay sheegeen in “Bitcoin wali halis ugu jirto hoos u dhac, islamarkaana ay khasab ku tahay inay ka sarreyso $102,000 si ay ugu sii jirto dariiqa dib-u-soo kabashada ee suurtagalka ah.”
Ku baro halkan crypto bilaw ilaa dhammaad luqaddaada hooyo
