Mashruucii CBDC-ga Imaaraadka oo ka gudbay marxaladdii koowaad

Tijaabadii ugu horraysay ee lacagta dhijitaalka ah ee bangiga dhexe ee Imaaraadka Carabta “Central Bank Digital Currency (CBDC)” “Dhirhamka Dhijitaalka ah” ayaa si rasmi ah loo dhammeystiray.

Mashruuca lacagta dhijitaalka ah ee bangiga dhexe ee Imaaraadka Carabta ayaa sameeyay macaamilkiisii ugu horreeyay, kaas oo lagu sheegay in uu ku dhammaaday wax ka yar laba daqiiqo.

Imaaraadka Carabta ayaa sameeyay macaamilkiisii ugu horreeyay ee lacagta dhijitaalka ah ee bangiga dhexe, taas oo ah warbixintii ugu weynayd tan iyo markii mashruuca lagu dhawaaqay bishii Maarso.

Wasaaradda Maaliyadda ee Imaaraadka iyo ta Dubai ayaa Talaadadii sheegtay in macaamilkaasi uu qeyb ka ahaa marxaladda tijaabada ee mashruuca Dirhamka Dhijitaalka ah, iyadoo la adeegsanayo madal lacag-bixin oo dowladeed oo lagu magacaabo mBridge.

Hay’adahaasi waxay sheegeen in macaamilkani uu yahay kii ugu horreeyay ee ay samayso dawladda Imaaraadka, isla markaana uu yahay “tallaabo loo qaadayey hirgelinta ballaadhan ee lacagta dhijitaalka ah ee qaranka, si loogu adeegsado hawlaha dawladda iyo kuwa gaarka loo leeyahay.”

Tani waa warbixintii ugu muhiimsanayd ee ku saabsan CBDC tan iyo markii Bangiga Dhexe ee Imaaraadka uu bishii Maarso sheegay in la filayo in lacagta dhijitaalka ah la bilaabo qeybinta rubuca afraad ee 2025.

Xigasho: Maktoum bin Mohammed

Tijaabada macaamilka waxay qaadatay wax ka yar laba daqiiqo

Agaasimaha guud ee xisaabaadka dhexe ee Maaliyadda Dubai, Axmed Cali Miftaax, ayaa sheegay in macaamilka lagu sameeyay “si loo tijaabiyo diyaarinta hawlgalka iyo in la hubiyo isku-xidhnaanta farsamo ee nidaamyada Bangiga Dhexe.”

“Macaamilka waxaa lagu dhammeystiray wax ka yar laba daqiiqo, taas oo muujinaysa ujeeddada lagu xoojinayo hufnaanta hawlgalka iyo dedejinta lacag dirista maaliyadeed ee u dhexeeya hay’adaha dawladda federaalka iyo kuwa maxalliga ah.”

Hirgelinta waxaa loo mari doonaa marxalado

Warqad siyaasadeed oo uu Bangiga Dhexe ee Imaaraadka soo saaray bishii Luulyo ayaa lagu sheegay in CBDC ay tahay isku day lagu ilaalinayo lacagta bangiga dhexe ee xilligan dhijitaalka ah ee aan joogno, si ay ula jaanqaaddo baahiyaha kobcaya ee dhaqaalaha dhijitaalka ah.

Waxay sidoo kale tilmaantay in hirgelintu ay dhici doonto marxalado, iyadoo astaamaha CBDC ee bilowga ah lagu koobi doono kaliya lacag-bixinta, si aysan ula tartamin kaydadka ama alaabooyinka maaliyadeed ee ribada leh.

CBDC-yadu waa arrin muran badan dhalisay, iyadoo dhaleeceeyayaashu ay ka walaacsan yihiin in ay wiiqi karto arrimaha gaarka ah iyo xasilloonida maaliyadeed, maadaama ay dadka si toos ah ula macaamili karaan bangiyada dhexe. Taageerayaashu se waxay ku doodayaan in CBDC ay wanaajin karto hufnaanta lacag-bixinta iyo fidinta helitaanka adeegyada maaliyadeed.

Kaliya saddex waddan ayaa si rasmi ah u bilaabay CBDC

Dawlado badan ayaa tijaabinaya CBDC. Bishii Oktoobar, Kyrgyzstan ayaa xaqiijisay in ay qorshaynayso in ay soo saarto lacag dhijitaal ah oo bangiga dhexe ah, halka Bangiga Dhexe ee Yurub uu go’aansaday in uu u gudbo wejiga xiga ee mashruuca Euro-da Dhijitaalka ah.

Si kastaba ha ahaatee, kaliya saddex CBDC ayaa si rasmi ah loo bilaabay, sida ay sheegtay hay’adda Mareykanka ah ee Atlantic Council.

Raadraaca CBDC wuxuu muujinayaa in Nigeria, Bahamas, iyo Jamaica ay yihiin saddexda dal ee kaliya ee leh lacag dhijitaal ah oo firfircoon, halka 49 dal oo kale ay weli ku jiraan marxaladda tijaabada.