Koox ka kooban shirkado waaweyn oo ka hawlgala crypto, bangiyo caadi ah, hay’adaha amniga iyo cilmi-baadhayaal ayaa ku dhawaaqay soo saaridda shabakad cusub oo loogu magac daray “Beacon Network”, taas oo ujeedkeedu yahay in si degdeg ah loo ogaado loona xannibo lacagaha loo adeegsado dambiyada ku saleysan crypto.
TRM Labs, oo ah shirkad hormuud u ah baadhitaanka dhaqaalaha crypto, ayaa Arbacadii sheegtay in Beacon Network uu yahay “sil-silad buuxda (end-to-end kill chain)” oo loogu talagalay lacagaha sharci-darrada ah, taas oo u oggolaanaysa in dhaq-dhaqaaqooda lagu ogaado oo tallaabo la qaado daqiiqado gudahood, halkii laga sugi lahaa maalmo.
TRM Labs waxay intaas ku dartay in nidaamkan cusub uu horseedayo heer iskaashi oo aan hore loo arag, kaas oo xannibaya marinada ay dambiilayaashu ka galaan suuqyada dhaqaalaha.
Baahida shabakadda cusub
Xogta TRM Labs waxay muujisay in tan iyo sanadkii 2023-ka, in in ka badan $47 bilyan loo diray wallet la xidhiidha tuug iyo falal dambiyeed. Shirkaddu waxay sheegtay in tiradani ka yar tahay tan la soo sheegin, maadaama inta badan dambiyada aan la shaacin.
Haddaba, si looga hortago in lacagaha la xaday ay si fudud ugu baxaan suuqyada ama loo dhaqo, Beacon Network wuxuu u oggolaanayaa xubnaha la xaqiijiyey inay calaamad (flag) saaraan Boorsadaha (wallets) looga shakiyo dambiyo. Markay lacagahaasi gaadhaan adeegyo ka tirsan shabakadda sida is-weydaarsiyada (exchanges) ama adeeg bixiyeyaasha lacagta dhijitaalka ah, digniin ayaa si toos ah loo diraa si lacagta loo qabto ka hor inta aan lala bixin ama la dhaqin.
Xubnaha aasaasiga u ah shabakaddan
Shabakaddan waxaa ka mid ah shirkado waaweyn oo crypto iyo fintech ka hawlgala:
- Coinbase, Binance, Kraken (is-weydaarsiyada ugu waaweyn),
- Robinhood (bangi ganacsi),
- PayPal (shirkadda lacag-bixinta caalamiga ah),
- Anchorage Digital, Ripple,
- iyo cilmi-baarayaasha amniga sida ZachXBT iyo Security Alliance.
Sidoo kale, TRM Labs waxay xaqiijisay in hay’ado sharci-fulin caalami ah ay si firfircoon uga qayb qaadanayaan shabakaddan, iyagoo calaamadeynaya Boorsado looga shakiyay khatar ay soo wadaan.
Sida ay u shaqeyso shabakadda Beacon Network
Marka lacag sharci-darro ah la calaamadeeyo, nidaamku wuxuu si toos ah ula socdaa dhaqdhaqaaqooda blockchain-ka. Haddii lacagta la xaday lagu shubo is-weydaarsi ka tirsan shabakadda, isla markiiba waxaa dirma digniin. Tani waxay ka hortagtaa in lacagta laga soo bixiyo ama la marsiiyo wareegyo lacag dhaqid oo kale.
Waxay si gaar ah uga duwan tahay nidaamyadii hore ee “dib u celinta” maadaama ay si toos ah ula socoto lacagaha daqiiqad kasta. TRM Labs waxay sheegtay in hore aysan jirin nidaam isku xidha hay’adaha kala duwan, taas oo keentay in dambiyada lagu ogaado oo keliya kadib markay lacagaha lunsadaan tuugtu tirtiraanna raadkooda.
Tusaalooyin guulo ay shabakaddan gaadhay ah
TRM Labs waxay sheegtay in Beacon Network horey loogu tijaabiyey xaalado dhowr ah oo guulo laga gaadhay:
Hal mar, hay’ad sharci-fulin ah ayaa raad-raacday lacag dhan $1.5 milyan oo lala xidhiidhiyay khiyaano caalami ah. Shabakadda ayaa gacan ka siisay in wallet lacagtu gashay la calaamadeeyo, si loogu xannibo is-weydaarsiga.
Kiis kale, koox baadhayaal ah ayaa ogaaday in $800,000 lagu shubay is-weydaarsi weyn, taas oo isla markiiba la calaamadeeyey lana xannibay.
Xakameynta iyo mas’uuliyadda
TRM Labs waxay sheegtay in keliya xubnaha si adag loo xaqiijiyey —hay’adaha sharci-fulinta, kuwa ka hawlgala amniga, iyo cilmi-baadhayaasha lagu kalsoon yahay in loo oggolaanayo inay calaamadeeyaan wallet-yada sharci-darrada ah.
Shirkaddu waxay intaas ku dartay in “calaamad kasta” ay wadato masuuliyad weyn, maadaama ay saameyn ku leedahay shabakadda oo dhan. Haddii qof si khalad ah ama si ula kac ah u isticmaalo nidaamka, waxay noqon doontaa mid aan loo dulqaadan doonin.
Bartilmaameedka waaweyn ee shabakaddan
In kasta oo shabakadda loo adeegsan karo dhammaan dambiyada la xidhiidha crypto, TRM Labs waxay sheegtay inay si gaar ah diiradda u saari doonaan:
- Kooxaha Shaqaalaha IT-ga Waqooyiga Kuuriya ee khiyaanada ku sameeya shirkadaha crypto,
- Hackers iyo tuugo xada lacagaha is-weydaarsiyada,
- Dhaqaalah argagixisadu mariso suuqan,
- iyo soo celinta lacagaha laga dhacay dadka dhibbanayaasha ah.
Sidoo kale, waxaa qorshaysan in la balaadhiyo tirada shirkadaha iyo hay’adaha doonaya inay ku soo biiraan shabakaddan.
Beacon Network ayaa loo arkaa inay tahay tallaabo cusub oo muhiim ah oo lagu difaacayo dhaqaalaha dhijitaalka ah, iyadoo si degdeg ah u mideyneysa shirkadaha waaweyn, hay’adaha sharci-fulinta iyo cilmi-baadhayaasha amniga.
Waxaa la filayaa in nidaamkan uu xakameyn weyn ku yeesho lacagaha sharci-darrada ah ee blockchain-ka la marsiiyo, taas oo ka dhigan in dambiyada crypto aysan noqon doonin kuwo u faafa sidii hore.
TRM Labs waxay ku adkaysatay in inkastoo halis iyo caqabado jireen, iskaashiga heerkan ah uu noqon doono mid ka hortagaya dambiyada oo si weyn uga difaacaya dadka isticmaala crypto iyo nidaamka dhaqaale guud ahaan dhibaatooyinka kaga iman lahaa tuugta.
Ku baro halkan crypto bilaw ilaa dhammaad luqaddaada hooyo