Ku xigeenka Guddoomiyaha Bangiga Dhexe ee Maraykanka ee u qaabilsan arrimaha kormeerka, Michelle Bowman, ayaa sheegtay in Fed dib uga laabto xayiraadaha ka mamnuucaya shaqaalaha inay iibsadaan crypto.
Bowman ayaa ku tilmaantay shir blockchain ah oo ka dhacay Wyoming in shaqaalaha Fed ay tahay in loo oggolaado inay haystaan “qadar yar oo crypto ah ama hantida dhijitaalka ah ee kale si ay u fahmaan sida ay u shaqeyaan suuqyadaasi ama farsamada salka ay ku hayaan fahmaan“.
Waxay tidhi: “Waxaan dhawaan dejin doonaa qaab lagu kormeero shirkadaha soo saaraya hantidaas.” Waxayna raacisay “Ma jiro beddel loo heli karo waayo-aragnimada tooska ah ee fahamka habka lahaanshaha suuqan u shaqeeyo iyo habka ay u socdaan lacagahan dhijitaalka ah ilaa aad ka qayb noqoto maahin e’.”
Hadda, inta badan shaqaalaha Fed iyo xaasaskooda waxaa laga mamnuucay inay haystaan crypto ama adeegyada la xidhiidha crypto, sida ETF-yada ama saamiyada shirkadaha crypto. Xeerarkan ayaa la adkeeyay horraantii 2022-ka, kadib markii la ogaaday in saddex mas’uul oo sare ay ku lug lahaayeen ganacsi aan sharci ahayn intii lagu jiray 2020-ka xilligii Fed-ku qaaday tallaabooyin lagu taageerayo dhaqaalaha Maraykanka xilligii hore ee COVID-19.
Oggolaanshaha crypto wuxuu fududayn karaa shaqaalaysiinta iyo sharci-dejinta
Bowman waxay sheegtay in xayiraadahaas ay noqon karaan “kuwo caqabad ku ah soo jiidashada iyo haynta khubarada loo baahan yahay”, isla markaana in dabacsanaan lagu sameeyo sharciyada ay siin doonto shaqaalaha fursad ay si dhab ah ugu fahmaan tiknoolajiyadda.
Sawirka Michelle Bowman
Waxay tusaale u soo qaadatay: “Marnaba qof iguma qancin karo inuu i baro dabbaasha haddii aanu waligiis dabbaalan, xitaa haddii uu akhriyay ama qoray buugaag iyo maqaallo badan oo ku saabsan dabbaasha.”
Bowman waxay sheegtay in kormeerayaasha bangiyada ay leeyihiin “maskax aad u taxaddar badan” waxayna ku boorisay inay ugu yaraan ka shakiyaan adeegyada maaliyadeed ee cusub, isla markaana ay aqoonsadaan muhiimadda iyo baahida loo qabo in tignoolajiyada loo adeegsado nidaamka dhaqaale ee qadiimiga ah macnaha dhijitaalka ahayn.
Waxay sheegtay in qaar ka mid ah bangiyada ay ka baqayaan in blockchain uu halis geliyo qaababka ganacsi ee qadiimiga ah, balse tiknolojiyaddu way baddeli qaababka bangiyadu u shaqeeyaan siday doonaan ha uga falceliyaan e’.
Bowman waxay ku dartay hadalkeeda: “Waa inaan go’aansannaa inaan isbeddelka aqbalno oo aan gacan ka geysanno dejinta qaab dhismeed waara oo lagu kalsoonaan karo, kaas oo ilaalinaya amniga iyo badqabka, isla markaana ku daraya kulminaya hufnaanta iyo xawaaraha horumarka ama waa inaan istaagno oo aan u oggolaanno tignoolajiyada cusub inay gebi ahaanba ka horumarto nidaam bangiyeedka qadiimiga ah.”
Waxay qirtay in ay jiraan khataro la xidhiidha qaadashada tignoolajiyada cusub, laakiin waxay tidhi “kuwaas waa la maareyn karaa marka aan aqoonsanno faa’iidooyinka ballaadhan ee laga heli karo.”
Trump oo dalka ka dhigaya mid crypto u fiican
Bowman ma aysan cayimin noocyada crypto ama qadarka saxda ah ee shaqaalaha in loo oggolaado ay rabto, balse hadalkeeda ayaa qayb ka ah mowqifyada wanaagsan ee maamulka Trump ka qaadanayo crypto.
Jimcihii, hay’adda Fed waxay sheegtay inay soo afjari doonto barnaamij kormeer ah oo la xidhiidha hawlaha bangiyada ee crypto iyo blockchain, kaas oo maamulka Biden dejiyay 2023-kii.
Sidoo kale, Madaxweyne Donald Trump ayaa toddobaadyo ka hor saxiixay amar fulineed oo faraya kormeerayaasha bangiyada inay baadhaan eedeymaha Xannibaadda akoonnada (debanking) ee ay ku sameeyeen shirkadaha crypto iyo siyaasiyiinta muxaafidka u ah crypto.
Innaga warkan waxaa innaga khuseeya haddii Fed loo oggolaado crypto waxaa iman doona nooc tilmaan ah ama aan kasii garanno kicitaanka suuqa marka ay iibsadaan koox ka mid ah Fed.
Ku baro halkan crypto bilaw ilaa dhammaad luqaddaada hooyo
